19-cu Azərbaycan Beynəlxalq Kənd Təsərrüfatı “Caspian Agro” və 31-ci Azərbaycan Beynəlxalq Qida Sənayesi “InterFood Azerbaijan” sərgilərinin iştirakçılarını səmimi qəlbdən salamlayıram.

Regionun aparıcı aqrar platformalarından biri kimi mövqeyini möhkəmləndirmiş “Caspian Agro” sərgisi bu il yeni konseptual yanaşma - “Caspian Agro Week” formatında təşkil olunur. Bu yanaşma çərçivəsində sərgi yalnız məhsul və texnologiyaların nümayişi ilə məhdudlaşmır, aqrar sektorun müxtəlif istiqamətlərini əhatə edən forumlar, həmçinin ölkədə fəaliyyət göstərən iri ixtisaslaşmış innovativ təsərrüfatlara təşkil olunan səfərləri özündə birləşdirir.

“Caspian Agro Week” çərçivəsində təşkil olunan konfrans və forumlar, eləcə də innovativ təsərrüfatlara səfərlər aqrar sahədə bilik və təcrübə mübadiləsinin dərinləşdirilməsinə, yeni yanaşmaların tətbiqinə və dayanıqlı inkişafın təşviqinə xidmət edir. Bu format aqrar ekosistemin bütün iştirakçılarını bir araya gətirərək əməkdaşlıq əlaqələrinin genişləndirilməsi üçün əlverişli imkanlar yaradır.

Sərgi çərçivəsində keçiriləcək tədbirlərdə kənd təsərrüfatının aktual çağırışları və inkişaf perspektivləri geniş müzakirə olunacaq. Dövlət qurumları, özəl sektor nümayəndələri, beynəlxalq tərəfdaşlar, elmi-tədqiqat institutları və innovasiya ekosisteminin iştirakçıları aqrar sahədə rəqəmsallaşma, süni intellektin tətbiqi, iqlim dəyişikliklərinə uyğunlaşma, dayanıqlı istehsal və digər prioritet istiqamətlər üzrə fikir mübadiləsi aparacaqlar.

Müasir dövrdə aqrar sektorun inkişafı qlobal çağırışlara uyğun innovativ yanaşmaların tətbiqini tələb edir. İqlim dəyişiklikləri, təbii resurslardan səmərəli istifadə, ərzaq təhlükəsizliyi və dayanıqlı istehsal modelləri əsas prioritetlərdəndir. Rəqəmsallaşma, süni intellekt və dəqiq kənd təsərrüfatı həlləri bu transformasiyanın aparıcı amilləridir.

Bu il sərgidə innovativ məhsul və texnologiyalar, rəqəmsal həllər və resurslardan səmərəli istifadəni təmin edən müasir yanaşmalar geniş şəkildə nümayiş etdirilir. Eyni zamanda, işğaldan azad edilmiş ərazilərdə həyata keçirilən aqrar layihələrin təqdimatı sərginin mühüm istiqamətlərindən birini təşkil edir. Bu yanaşmalar məhsuldarlığın artırılmasına və sektorun rəqabət qabiliyyətinin gücləndirilməsinə xidmət edir.

Sərgi çərçivəsində keçiriləcək tədbirlər kənd təsərrüfatının aktual məsələlərinin müzakirəsi və müxtəlif tərəflər arasında əməkdaşlığın genişləndirilməsi baxımından mühüm əhəmiyyət kəsb edir.

Respublikamızda kənd təsərrüfatının inkişafı dövlət siyasətinin prioritet istiqamətlərindən biridir. Həyata keçirilən islahatlar və tətbiq olunan müasir yanaşmalar aqrar sektorun dayanıqlı inkişafını və beynəlxalq rəqabət qabiliyyətinin artırılmasını təmin edir.

Əminəm ki, “Caspian Agro Week” çərçivəsində keçirilən tədbirlər yeni əməkdaşlıqların qurulmasına və aqrar sektorun uzunmüddətli inkişafına mühüm töhfə verəcək.

Sərgi iştirakçılarına uğurlar arzulayır, platformanın yaratdığı imkanlardan səmərəli istifadə etməyə dəvət edirəm.

Hörmətlə,

Məcnun Məmmədov
Azərbaycan Respublikasının Kənd Təsərrüfatı Nazirliyi Nazir

Kiçik və Orta Biznesin İnkişafı Agentliyi (KOBİA) adından “Caspian Agro Week” – 19-cu Azərbaycan Beynəlxalq Kənd Təsərrüfatı Sərgisi və Forumu və “InterFood Azerbaijan” – 31-ci Azərbaycan Beynəlxalq Qida Sənayesi Sərgisinin təşkilatçılarını, iştirakçılarını və ziyarətçilərini salamlayıram.

Aqrar və qida sənayesinin iştirakçılarını bir araya gətirən bu mötəbər platformalar müvafiq sektorlarda tətbiq olunan ən son yeniliklərin və innovativ həllərin təqdimatı, yeni tərəfdaşlıqların qurulması və biznes imkanlarının genişləndirilməsi baxımından xüsusi əhəmiyyət daşıyır. Bu sərgilər həmçinin qabaqcıl təcrübə mübadiləsi əsasında sektorun inkişaf istiqamətlərini müəyyənləşdirən mühüm görüş məkanıdır. Burada təqdim olunan müasir yanaşmalar kənd təsərrüfatında məhsuldarlığın artırılması, qida sənayesində keyfiyyət standartlarının yüksəldilməsi, resurslardan daha səmərəli istifadə və “yaşıl iqtisadiyyat” prinsiplərinin tətbiqi istiqamətində əldə olunan irəliləyişi əyani şəkildə görməyə imkan verir.

Kənd təsərrüfatı və qida sənayesi ölkəmizin qeyri-neft iqtisadiyyatının inkişafında aparıcı sahələrdəndir. Azərbaycan Respublikasının Prezidenti cənab İlham Əliyevin rəhbərliyi ilə aqrar sektorun modernləşdirilməsi, ərzaq təhlükəsizliyinin gücləndirilməsi və ixrac potensialının artırılması istiqamətində həyata keçirilən tədbirlər, o cümlədən aqroparkların yaradılması, fermerlərin subsidiya və güzəştli maliyyə resurslarına çıxışının genişləndirilməsi və müasir texnologiyaların tətbiqi aqrar və qida sənayesinin dayanıqlı inkişafında önəmli rol oynayır.

Bu sektorlarda fəaliyyət göstərən KOB subyektlərinin innovativ yanaşmaları da sahənin rəqabət qabiliyyətinin artırılmasına öz töhfəsini verir. Sahibkarlar üçün yaradılmış əlverişli biznes mühiti, dövlət dəstəyi mexanizmləri və investisiya imkanları aqrar və qida sahələrində yeni biznes təşəbbüslərinin reallaşmasını stimullaşdırır.

İşğaldan azad edilmiş ərazilərin zəngin təbii resursları, münbit torpaq ehtiyatı və geniş istehsal imkanları müvafiq sektorların inkişafı üçün yeni perspektivlər açır. Bu ərazilərdə dövlət dəstəyi və “yaşıl iqtisadiyyat” yanaşması əsasında qurulan müasir kənd təsərrüfatı və emal müəssisələri, dayanıqlı istehsal modelləri sahibkarlar üçün cəlbedici biznes imkanları yaradır. Sevindirici haldır ki, həmin ərazilərdə istehsal olunan məhsullar artıq müxtəlif sərgilərdə nümayiş etdirilir və bazarlara çıxış imkanları genişlənir.

KOBİA olaraq kiçik və orta biznes subyektlərinin bu kimi beynəlxalq sərgilərdə fəal iştirakını dəstəkləmək prioritetlərimizdəndir. Bu platformalar KOB-ların məhsul və xidmətlərini geniş auditoriyaya təqdim etməsi, satış imkanlarını artırması, həmçinin yeni işgüzar əlaqələr qurması üçün mühüm rol oynayır. Bu il də yerli KOB-ların müvafiq

sərgilərdə təmsil olunmasına dəstək göstərməkdən məmnunuq və onların uğurlarının davamlı olacağına inanırıq.

Əminik ki, sərgi çərçivəsində aparılan müzakirələr, təqdim olunan innovativ həllər, “yaşıl iqtisadiyyat” təşəbbüsləri və qurulan tərəfdaşlıqlar aqrar və qida sənayesinin davamlı inkişafına mühüm töhfə verəcək. Fürsətdən istifadə edərək KOBİA adından sərgi iştirakçılarına məhsuldar görüşlər, uğurlu əməkdaşlıqlar və yeni nailiyyətlər arzulayıram.

Hörmətlə,

Orxan Məmmədov

Azərbaycan Respublikasının Kiçik və Orta Biznesin İnkişafı Agentliyi (KOBİA)

İdarə Heyətinin sədri

Əziz qonaqlar!

Sizi 31-ci Azərbaycan Beynəlxalq Qida Sənayesi (“InterFood Azerbaijan 2026”) və 19-cu Azərbaycan Beynəlxalq Kənd Təsərrüfatı (“Caspian Agro Week 2026”) sərgilərinin açılışında salamlayır, bütün iştirakçılara uğurlar arzulayıram.

Bu nüfuzlu tədbirlərdə iştirakınız ölkəmizin aqrar və qida sənayesi sahələrinə göstərilən diqqətin, eləcə də beynəlxalq əməkdaşlığa verilən önəmin bariz göstəricisidir.

Qeyri-neft-qaz sektorunun strateji inkişafında aparıcı rol oynayan aqrar sahə və qida sənayesinə həsr olunmuş bu sərgilər dayanıqlı iqtisadi artıma xidmət etməklə yanaşı, yerli və xarici işgüzar dairələr arasında əməkdaşlıq imkanlarını daha da genişləndirir. Hər iki sərgi məhsulların geniş təqdimatı ilə bərabər, qida sənayesində innovativ yanaşma və müasir həllərin tətbiqinə, kənd təsərrüfatı üzrə qabaqcıl beynəlxalq təcrübənin mənimsənilməsinə və faydalı tərəfdaşlıqların qurulmasına əlverişli zəmin yaradan mühüm platforma qismində çıxış edir.

Azərbaycan şirkətləri müntəzəm olaraq qlobal və yerli sərgilərdə uğurla iştirak edir, yerli məhsullarımız “Made in Azerbaijan” brendi altında təqdim edilir.

Bununla yanaşı, “InterFood Azerbaijan” və “Caspian Agro Week” sərgilərində müxtəlif ölkələri təmsil edən çoxlu sayda şirkətin iştirakı həmin tədbirlərin geniş miqyasını və əhəmiyyətini aydın nümayiş etdirir.

Əminəm ki, builki sərgilər də məhsuldarlıq, yeni tərəfdaşlıqlar və innovativ təşəbbüslərlə yadda qalacaq.

Sərgi iştirakçılarına bir daha uğurlar arzulayır, bu tədbirlərin təqdim etdiyi imkanlardan səmərəli yararlanmağa çağırıram.

Hörmətlə,

Yusif Abdullayev
İcraçı direktor
Azərbaycan Respublikasının İxracın və İnvestisiyaların Təşviqi Agentliyi – AZPROMO

Azərbaycan Qida və İçki Sənayeçiləri Assosiasiyası (AQİSA) adından sizi 31-ci Azərbaycan Beynəlxalq Qida Sənayesi Sərgisi – “InterFood Azerbaijan 2026” və 19-cu Azərbaycan Beynəlxalq Kənd Təsərrüfatı Sərgi və Forumu – “Caspian Agro Week 2026” münasibətilə səmimi qəlbdən salamlayıram.

Bu sərgilər artıq uzun illərdir ki, ölkəmizin və regionun qida və aqrar sənayesi üçün nüfuzlu və etibarlı biznes platforması kimi çıxış edir. Yerli və beynəlxalq şirkətləri, istehsalçıları, fermerləri və sərmayədarları bir araya gətirən bu tədbirlər sektorun inkişafına real töhfə verir.

AQİSA olaraq əsas məqsədimiz qida və alkoqolsuz içki sənayesində dayanıqlı əməkdaşlığı təşviq etmək, innovasiyaların tətbiqini sürətləndirmək və milli qida sənayesi ekosisteminin güclənməsinə dəstək olmaqdır. “InterFood Azerbaijan” və “Caspian Agro Week” sərgiləri bu hədəflərə çatmaq üçün mühüm imkanlar yaradır.

Qida təhlükəsizliyi, dayanıqlı istehsal və iqlimə uyğun texnologiyalar bu gün qlobal gündəliyin əsas mövzularındandır. Azərbaycanın yaşıl iqtisadiyyata keçid istiqamətində atdığı addımlar və beynəlxalq təşəbbüslərdə fəal iştirakı bu sahədə artan regional rolunu bir daha nümayiş etdirir. Cari sərgilərdə təqdim olunan innovativ həllər də məhz bu yanaşmanı əks etdirir.

Eyni zamanda vurğulamaq istərdim ki, Azərbaycan regional logistika və nəqliyyat dəhlizi kimi strateji mövqeyə malikdir. Şərq–Qərb, Şimal–Cənub marşrutları və Zəngəzur dəhlizi regionda qida təchizatının sabit və fasiləsiz təmin olunması üçün yeni imkanlar yaradır və ölkəmizin ixrac potensialını gücləndirir.

İnanırıq ki, “InterFood Azerbaijan 2026” və “Caspian Agro Week 2026” sərgiləri yeni tərəfdaşlıqların qurulmasına, bazar imkanlarının genişlənməsinə və sektorun davamlı inkişafına mühüm töhfə verəcəkdir.

Bütün iştirakçılara uğurlu və məhsuldar iş arzulayır, sərgilər çərçivəsində yaradılacaq əməkdaşlıqların gələcək inkişaf üçün dəyərli nəticələr verəcəyinə inanırıq.

Hörmətlə,

Emin Dostiyari
İdarə Heyətinin sədri
Azərbaycan Qida və İçki Sənayeçiləri Assosiasiyası (AQİSA)

Sizi 19-cu Azərbaycan Beynəlxalq Kənd Təsərrüfatı Sərgisində və 31-ci Azərbaycan Beynəlxalq Qida Sənayesi Sərgisində salamlamaqdan böyük məmnunluq duyuram. BMT-nin Ərzaq və Kənd Təsərrüfatı Təşkilatı (FAO) ərzaq təhlükəsizliyinin təmin olunması, kənd təsərrüfatının inkişafı, daha dayanıqlı və davamlı ərzaq sistemlərinin qurulması naminə hər gün çalışan insanları bir araya gətirən bu mühüm platformanın bir hissəsi olmaqdan qürur duyur.

Bu il keçirilən sərgi kənd təsərrüfatı sektoru üçün xüsusi əhəmiyyət kəsb edən bir dövrə təsadüf edir. 2026-cı ilin proqramı həm dünyada, həm də Azərbaycanda kənd təsərrüfatının gələcəyini formalaşdıran ən aktual məsələləri və perspektivli həll yollarını əhatə edir. Beynəlxalq logistika zəncirlərində baş verən pozuntular, regional qeyri-sabitlik və təchizat zəncirlərinin həssaslığı ilə xarakterizə olunan qlobal qeyri-müəyyənlik şəraitində güclü, dayanıqlı və özünü təmin edən kənd təsərrüfatının əhəmiyyəti heç vaxt indiki qədər böyük olmamışdır. Ağıllı suvarma və su sektorunda islahatlar, rəqəmsal kənd təsərrüfatı və süni intellektin tətbiqi, torpaqların regenerativ idarə olunması, “soyuq zəncir” logistika və izləniləbilənlik, aqroparkların və ağıllı kəndlərin inkişafı kimi mövzular sektorun innovasiya, davamlılıq və iqlimə davamlılıq istiqamətində sürətli transformasiyasını əks etdirir.

Bu mövzular FAO-nun prioritetləri ilə tam üst-üstə düşür. İqlim dəyişkənliyinin bütün dünyada fermerlər üçün yaratdığı çağırışlar fonunda su ehtiyatlarından səmərəli istifadə, torpaq sağlamlığının qorunması, rəqəmsal alətlərin tətbiqi və müasir dəyər zəncirlərinə investisiya qoyuluşu artıq seçim deyil, zərurətdir. Caspian Agro Week 2026 çərçivəsində keçirilən müzakirələr və tədbirlər bu prioritetlərin irəlilədilməsinə, qlobal biliklərin yerli nəticələrə çevrilməsinə xidmət edir.

Azərbaycanda FAO ilə Hökumət arasında tərəfdaşlıq ildən-ilə daha da möhkəmlənir. Birgə səylərimiz nəticəsində daha səmərəli suvarma üsulları tətbiq olunur, kooperativlər gücləndirilir, torpaq və su ehtiyatlarının davamlı idarə olunması dəstəklənir, fermerlər təlimlər və rəqəmsal alətlər vasitəsilə yeni imkanlar əldə edirlər. Bu təşəbbüslər yalnız məhsuldarlığın artırılmasına deyil, həm də insanların rifahının yüksəldilməsinə, ekosistemlərin qorunmasına və kənd icmaları üçün yeni imkanların yaradılmasına xidmət edir.

Kənd təsərrüfatı Azərbaycanın milli kimliyinin və iqtisadi inkişafının əsas sütunlarından biri olaraq qalır. Sektor müasirləşdikcə, FAO innovasiyaların təşviqi, siyasətlərin təkmilləşdirilməsi, rəqəmsal transformasiya və fermerlərin dəyişən şəraitə uyğunlaşmasına kömək edən iqlimədavamlı həllərin tətbiqi istiqamətində dəstəyini davam etdirəcəkdir. Eyni zamanda, biz anlayırıq ki, həqiqi transformasiya yalnız birgə səylərlə mümkündür. Hökumətlər, beynəlxalq təşkilatlar, özəl sektor, akademik dairələr və fermerlər məhsuldar və davamlı kənd təsərrüfatının gələcəyinin qurulmasında mühüm rol oynayırlar.

Azərbaycanın aqrar-ərzaq sektorunun nailiyyətlərini qeyd edərkən və əməkdaşlığın yeni üfüqlərinə nəzər salarkən, hər birinizə fədakar fəaliyyətinizə görə təşəkkürümü bildirirəm. Caspian Agro Week sadəcə sərgi deyil – bu, öyrənmək, əməkdaşlıq etmək, yaradıcı ideyalar formalaşdırmaq və tərəfdaşlıqlar qurmaq üçün unikal bir məkandır. Burada müzakirə olunan ideyalar gələcək illər üçün ərzaq sistemlərinin inkişaf istiqamətini müəyyənləşdirmək gücünə malikdir.

Biz daha dayanıqlı kənd təsərrüfatı gələcəyi naminə birlikdə çalışarkən, bunu yalnız gələcək nəsillər qarşısında deyil, həm də özümüz qarşısında məsuliyyət daşıdığımızı dərk edərək edirik. Məqsədimiz torpağın çiçəkləndiyi, icmaların inkişaf etdiyi və hər bir insanın ləyaqətli və təminatlı həyat sürdüyü bir dünya qurmaqdır.

FAO adından sizə builki sərgidə uğurlu, ilhamverici və səmərəli iştirak arzulayıram. Qoy müzakirələriniz yeni həllərə, tərəfdaşlıqlarınız davamlı inkişafa, səyləriniz isə Azərbaycanda və onun hüdudlarından kənarda kənd təsərrüfatının daha da güclənməsinə töhfə versin.

Hörmətlə,

Nasar Hayat
FAO-nun Azərbaycandakı Nümayəndəsi və FAO-nun Azərbaycan üzrə Tərəfdaşlıq və Əlaqələndirmə Ofisinin rəhbəri