Sizləri 18-ci Azərbaycan Beynəlxalq Kənd Təsərrüfatı və 30-cu Azərbaycan Beynəlxalq Qida Sənayesi Sərgisində salamlamaqdan məmnunluq duyuram. 

“Caspian Agro” və bu il yubileyini qeyd edən “InterFood Azerbaijan” sərgiləri artıq illərdir ki, kənd təsərrüfatı və qida sənayesində yerli və xarici şirkətlərin innovativ həllərini, yeni texnologiyalarını təqdim etdiyi mühüm platformalardan biri kimi çıxış edir. 

Bu sərgi fermerlər, sahibkarlar, investorlar və mütəxəssislər üçün kənd təsərrüfatı və qida sənayesinin aktual məsələləri barədə fikir mübadiləsi aparmaq, biznes əlaqələri qurmaq və müasir innovasiyalarla tanış olmaq imkanı yaradır. 

Son illərdə ölkəmizdə kənd təsərrüfatının inkişafı istiqamətində genişmiqyaslı islahatlar həyata keçirilmiş, dövlət dəstək mexanizmləri gücləndirilmiş, fermerlərin texnologiya və maliyyə resurslarına çıxışı asanlaşdırılmışdır. Fermerlərimizin müasir kənd təsərrüfatı texnikası, dəqiq əkinçilik sistemləri, rəqəmsal idarəetmə vasitələri və ekoloji təmiz istehsal texnologiyaları ilə tanış olması üçün imkanlar yaradılmışdır. 

Bu il sərgidə süni intellektin tətbiqinə əsaslanan yeni həllər, ağıllı idarəetmə sisteminə əsaslanan avtomatlaşdırılmış texnologiyalar, enerji və resursqoruyucu texnologiyalar, alternativ enerji mənbələrindən istifadə edən avadanlıqlar, iqlim dəyişikliyinə davamlı kənd təsərrüfatı məhsulları və dayanıqlı təsərrüfatçılıq həlləri xüsusi vurğulanır.  

İqlim dəyişikliklərinin təsirlərini azaltmaq, torpaq və su ehtiyatlarından səmərəli istifadəni genişləndirmək və kənd təsərrüfatını daha ekoloji və səmərəli hala gətirmək üçün biz innovativ yanaşmalar tətbiq edirik. 

Daha çox rəqəmsal həllərin tətbiqi, elektron kənd təsərrüfatı platformalarının genişləndirilməsi, aqrar sahədə çalışan sahibkarlar üçün maliyyə və sığorta alətlərinin əlçatanlığının artırılması da bu sahədə əsas hədəflərdəndir. Ölkəmizdə yeni bitki sortlarının və heyvandarlıqda məhsuldar cinslərin tətbiqi, müasir texnologiyalar əsasında təsərrüfat modellərinin formalaşdırılması və istehsal proseslərinin avtomatlaşdırılması aqrar sektorun inkişafına müsbət təsir göstərəcəyinə inanırıq. 

Builki sərginin əhəmiyyətini artıran mühüm hadisələrə balıqçılıq və akvakultura sahəsinin də sərgidə təmsil edilməsi və II Beynəlxalq Aqrar İnnovasiya Forumunun keçirilməsidir. Caspian Agro sərgisi balıqçılıq və akvakultura sahəsinin də inkişafına dəstək verəcək innovativ həllərin və qabaqcıl texnologiyaların nümayişi üçün mühüm platformadır. Eyni zamanda, forum çərçivəsində fermerlər və aqrobiznes nümayəndələri üçün yeni imkanlar açacaq, bilik və təcrübə mübadiləsi aparmaq imkanı yaradacaqdır. Ümid edirəm ki, sərgi kənd təsərrüfatı sahəsində çalışan hər kəs üçün faydalı olacaq, onların təcrübələrini artıracaq və biznes imkanlarını genişləndirəcəkdir. 

Sərgi iştirakçılarına bir daha uğurlar arzulayır, kənd təsərrüfatının inkişafına töhfə vermək üçün bu tədbirin yaratdığı imkanlardan səmərəli şəkildə yararlanmağa dəvət edirəm.

Hörmətlə, 

Məcnun Məmmədov 
Azərbaycan Respublikasının Kənd Təsərrüfatı  Nazirliyi
Nazir 

30-cu Azərbaycan Beynəlxalq Qida Sənayesi “InterFood Azerbaijan” və 18-ci Azərbaycan Beynəlxalq Kənd Təsərrüfatı “Caspian Agro” sərgilərinin iştirakçılarını və dəyərli qonaqları Azərbaycan Respublikasının Qida Təhlükəsizliyi Agentliyi adından dərin hörmət və ehtiramla salamlayıram. 

Bu gün dünyada baş verən qlobal iqlim dəyişiklikləri və iqtisadi-siyasi sınaqlarla qarşılaşdığımız bir dönəmdə ölkəmizdə qlobal, inkişafyönümlü tədbirlər həyata keçirilməkdədir. Kənd təsərrüfatı və qida sənayesinin yüksəlişi daxili və xarici bazarda yeni imkanların, iqtisadi-ticari əlaqələrin daha da genişlənməsi üçün münasib şərait yaradır. 

Qeyd edim ki, “Azərbaycan Respublikasında qida təhlükəsizliyinin təmin edilməsinə dair 2019-2025-ci illər üçün Dövlət Proqramı”nın icrası ilə əlaqədar Azərbaycan Respublikasının Qida Təhlükəsizliyi Agentliyi tərəfindən ölkədə insan, heyvan və bitki sağlamlığı üçün təhlükə törədən müvafiq risklərin idarə edilməsi, biotəhlükəsizliyin qorunması və təmin olunması istiqamətində ardıcıl və məqsədyönlü tədbirlər həyata keçirilməkdədir.  

 Agentlik tərəfindən qida təhlükəsizliyi sahəsində mövcud qanunvericilik aktlarına müvafiq dəyişikliklər edilmiş, habelə 7 yeni normativ hüquqi akt hazırlanaraq təsdiq edilmişdir. “Bitki sağlamlığı haqqında” Azərbaycan Respublikasının Qanunu layihəsi hazırlanaraq aidiyyəti dövlət qurumlarına rəy üçün göndərilmiş, hazırda maraqlı tərəflərin iştirakı ilə geniş ictimai müzakirəsi keçirilməkdədir. Eyni zamanda, heyvan sağlamlığı sahəsində mövcud qanunvericiliyi beynəlxalq tələblərə uyğunlaşdırmaq məqsədilə beynəlxalq ekspertlərin tövsiyələri də nəzərə alınmaqla, “Heyvan sağlamlığı haqqında” Azərbaycan Respublikasının Qanunu layihəsi hazırlanmışdır.  

 İdxal və ixrac əməliyyatları zamanı qida təhlükəsizliyinə nəzarətin operativ həyata keçirilməsi məqsədilə Qazax rayonunun Gürcüstan Respublikası ilə sərhəd buraxılış məntəqəsinə yaxın ərazisində yaradılmış “Qırmızı körpü” Qida təhlükəsizliyi nəzarəti məntəqəsi lazımi bütün avadanlıqlarla təchiz edilmiş və fəaliyyətə başlamışdır. 

 Ölkədə bioloji təhlükəsizliyin təmin olunması istiqamətində aparılan məqsədyönlü tədbirlər, dünyada mövcud olan bir sıra heyvan xəstəliklərindən azad statusların əldə edilməsi, beynəlxalq əməkdaşlıq əlaqələrinin inkişaf etdirilməsi və yeni əlaqələrin qurulması ölkəmizdə istehsal olunan bir sıra qida məhsullarının ixrac potensialı üçün münbit şərait yaradır.  

 Belə ki, Azərbaycan Respublikasından bir sıra ölkələrə, o cümlədən Rusiya Federasiyasına, Çin Xalq Respublikasına quşçuluq məhsullarının, bununla yanaşı, ilk dəfə olaraq Amerika Birləşmiş Ştatlarına ərzaqlıq yumurtanın ixracına başlanılıb. Akvakulturada yetişdirilən nərəkimilər cinsindən olan balıqlardan əldə  olunmuş kürü məhsullarının Avropa İttifaqı ölkələrinə ixracı üçün icazənin davamlılığı təmin edilmişdir. 

Azərbaycan Respublikası Prezidentinin müvafiq Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nda qida təhlükəsizliyi sahəsində qarşıya qoyulmuş tədbirlərin icrası uğurla davam etdirilmişdir. Ümumdünya Heyvan Sağlamlığı Təşkilatının tələblərinə uyğun olaraq işğaldan azad edilmiş ərazilərdə yaradılacaq heyvan xəstəliklərindən azad zona ilə bağlı təsərrüfatlarda epizootoloji monitorinq və digər zəruri tədbirlər həyata keçirilmişdir.  

Hörmətli tədbir iştirakçıları! 

İnanıram ki, qida zəncirinin bütün mərhələlərində fəaliyyət göstərən tərəflərin iştirak etdiyi bu beynəlxalq tədbirdə qida sahəsində məhsul və xidmətlərin nümayiş etdirilməsi yeni işgüzar əlaqələrin qurulmasına və genişləndirilməsinə böyük töhfə verəcək.  

Fürsətdən istifadə edərək, 30-cu Yubiley Azərbaycan Beynəlxalq Qida Sənayesi “InterFood Azerbaijan” və 18-ci Azərbaycan Beynəlxalq Kənd Təsərrüfatı “Caspian Agro” sərgilərinin təşkilatçılarına və iştirakçılarına minnətdarlığımı bildirir, biznes fəaliyyətlərində yeni uğurlar arzu edirəm. 

Diqqətinizə görə təşəkkür edirəm!   


Qoşqar Təhməzli  
AQTA  
sədr 

Azərbaycan Respublikasının Kiçik və Orta Biznesin İnkişafı Agentliyi (KOBİA) adından “Caspian Agro” - 18-ci Azərbaycan Beynəlxalq Kənd Təsərrüfatı və “InterFood Azerbaijan” - 30-cu Azərbaycan Beynəlxalq Qida Sənayesi sərgilərinin təşkilatçılarını, iştirakçıları və ziyarətçiləri salamlayıram. 

Hər il təşkil olunan bu sərgilər aqrar və qida sektorlarında qazanılan uğurların, innovativ texnologiya və müasir texnikaların nümayiş olunduğu əhəmiyyətli platformalardandır. Xüsusilə, sərgilərdə nümayiş etdirilən ən son aqrar texnologiyalar və innovasiyalar müvafiq sektorlarda məhsuldarlığın artırılmasını, resurslardan daha səmərəli istifadəni və ekoloji cəhətdən dayanıqlı həllərin tətbiqini təşviq edir. Müxtəlif sahələri əhatə edən şirkətləri, o cümlədən idxalçı və ixracatçıları, distribütorları, xarici və yerli ekspertləri, eləcə də ziyarətçiləri bir yerə toplayan sərgilər fikir və təcrübə mübadiləsi, yeni əməkdaşlıqların qurulması və genişləndirilməsi üçün də əlverişlidir. 

Kənd təsərrüfatı və qida sənayesi qeyri-neft sektorunun prioritet sahələrindən olmaqla yanaşı, həm də KOB subyektlərinin daha çox fəaliyyət göstərdiyi sektorlardandır. Azərbaycanın malik olduğu əlverişli biznes və investisiya mühiti, sahibkarlıq fəaliyyəti üçün mövcud dəstək alətləri sözügedən sahələrdə biznesin qurulması və inkişaf etdirilməsini stimullaşdırır. İşğaldan azad edilmiş torpaqlarımızın böyük iqtisadi potensialı və kənd təsərrüfatı üçün münbit torpaq ehtiyatına malik olması da aqrar sektor və qida sənayesi üçün yeni imkanlar yaradır. Sevindirici haldır ki, işğaldan azad edilmiş ərazilərdə istehsal olunan müxtəlif məhsullar artıq ölkəmizdə və xaricdə keçirilən ixtisaslaşmış sərgilərdə nümayiş olunur. KOBİA olaraq mandatımız çərçivəsində aqrar və qida sektorlarında biznesin qurulması və genişləndirilməsini təşviq edirik. Eyni zamanda müvafiq sektorlarda çalışan sahibkarlar və potensial iş adamları Agentliyin müxtəlif dəstək və xidmətlərindən yararlanmaqla bizneslərini inkişaf etdirə bilərlər.  

KOBİA üçün belə sərgiləri əhəmiyyətli edən həm də burada xeyli sayda yerli KOB subyektlərinin təmsil olunmasıdır ki, bu, onların tanınması, satış imkanlarının genişlənməsi və işgüzar əlaqələrinin inkişafı baxımından önəmlidir. Agentlik olaraq artıq bir neçə ildir ki, KOB-ların “Caspian Agro” və “InterFood Azerbaijan” sərgilərində iştirakını dəstəkləyirik. Bu il də KOB-ların müvafiq sərgilərdə iştirakına dəstək göstərməkdən məmnunuq.  

Fürsətdən istifadə edərək, sərgilərin iştirakçılarına uğurlar arzulayır, burada qurulan yeni əməkdaşlıqların və aparılan müzakirələrin ölkəmizin aqrar və qida sənayesinin inkişafına töhfə verəcəyinə əminik.  

Hörmətlə,  

Orxan Məmmədov  
Azərbaycan Respublikasının Kiçik və Orta Biznesin İnkişafı Agentliyi (KOBİA)  
İdarə Heyətinin sədri  

Hər birinizi 30-cu Yubiley Azərbaycan Beynəlxalq Qida Sənayesi ("InterFood Azerbaijan 2025") və 18-ci Azərbaycan Beynəlxalq Kənd Təsərrüfatı ("Caspian Agro 2025") sərgilərinin açılışında salamlayıram. Bu mötəbər tədbirlərin təşkilində əməyi keçən hər kəsə İxracın və İnvestisiyaların Təşviqi Agentliyi – AZPROMO adından təşəkkürümü bildirirəm. 

Qeyri-neft-qaz sektorunun inkişafı ölkəmizin iqtisadi strategiyasının əsas prioritetlərindən biridir. Bu baxımdan aqrar sahə və qida sənayesi üzrə beynəlxalq sərgilərin təşkili dayanıqlı iqtisadi artıma mühüm töhfə verməklə yanaşı, yerli və xarici sahibkarlar arasında əməkdaşlığın genişləndirilməsinə də imkan yaradır. Hər iki sərgi təkcə məhsulların nümayiş olunduğu bir platforma deyil, həm də qida istehsalında innovativ həllərin tətbiqi, kənd təsərrüfatı sahəsində beynəlxalq təcrübənin öyrənilməsi və perspektivli tərəfdaşlıqların qurulması üçün ideal fürsətdir. 

Azərbaycan şirkətləri AZPROMO-nun dəstəyi ilə beynəlxalq və yerli sərgilərdə fəal iştirak edir, məhsullarını "Made in Azerbaijan" brendi altında təqdim edərək ixrac imkanlarını genişləndirirlər. Ölkəmiz bu sahədə böyük təcrübəyə malikdir və bu il də xarici və yerli biznes nümayəndələri arasında əlaqələrin möhkəmlənməsi istiqamətində fəal fəaliyyətimizi davam etdirəcəyik. 

Xatırlatmaq istərdim ki, ötən il keçirilən "InterFood Azerbaijan" sərgisində 22 ölkədən 218 şirkət, "Caspian Agro" sərgisində isə 27 ölkədən 285 şirkət iştirak edib. Bu, sərgilərin əhəmiyyətini və onların biznes dairələri üçün nə qədər vacib bir platforma olduğunu bir daha sübut edir. 

Əminəm ki, builki sərgilər də faydalı əməkdaşlıqlarla, yeni işgüzar əlaqələrlə və maraqlı təşəbbüslərlə yadda qalacaq. 

Bir daha AZPROMO adından təşkilatçılara minnətdarlığımı bildirir, sərgilərin bütün iştirakçılarına məhsuldar görüşlər və uğurlar arzulayıram! 

Hörmətlə, 

Yusif Abdullayev 
AZPROMO  
İcraçı direktor 

Azərbaycan Respublikası Sahibkarlar (İşəgötürənlər) Təşkilatları Milli Konfederasiyası adından “Caspian Agro” 2025 - 18-ci Azərbaycan Beynəlxalq Kənd Təsərrüfatı və “Interfood Azerbaijan” 2025 - 30-cu Azərbaycan Beynəlxalq Qida Sənayesi sərgilərinin bütün iştirakçılarını  ürəkdən salamlayıram.  

Bu il Azərbaycan Beynəlxalq Qida Sənayesi sərgisinin yubileyini qeyd edirik. Bu münasibətlə “Caspian Event Organisers”MMC şirkətinin bütün komandasını təbrik edirəm və fəaliyyətinizdə daha böyük uğurlar arzu edirəm.   

Azərbaycanda aqrar sahənin inkişafı həm əhalinin məşğulluğu, həm də ölkəmizin ərzaq təhlükəsizliyi baxımından mühüm məsələdir.  

Möhtərəm prezident İlham Əliyevin rəhbərliyilə ölkədə yüzlərlə müasir aqroparklar, sənaye müəssisəsi, yeni istehsal sahələri yaradılıb. Daxili tələbatın ödənilməsində yerli məhsulların payı əhəmiyyətli dərəcədə artıb, ixrac imkanları genişlənib. Nəticədə ixracdakı qeyri-neft sektorunun payı və məhsul çeşidləri ilbəil artır. 

Ölkəmizdə artıq ənənə halını almış “Caspian Agro” sərgisi dünya ölkələrinin Azərbaycanın aqrar və kənd təsərrüfatı sənayesinə marağını artırır, həmçinin bioloji təmiz məhsulların istehsalında xüsusən də işğaldan azad edilmiş ərazilərimizə investisiya cəlb olunmasına yeni imkanlar açır.  

Əminəm ki, “Caspian Agro” və “Interfood Azerbaijan” bu il də qida sənayesi mütəxəssisləri üçün yeniliklərlə zəngin, faydalı bir platforma olacaq. Bu sahədə yeni texnologiyaların tətbiqi, əməkdaşlıqların qurulması, xarici mütəxəssislərlə təcrübə mübadiləsi imkanlarını daha yüksək mərhələyə qaldıracaq.  

Azərbaycan Respublikası Sahibkarlar (İşəgötürənlər) Təşkilatları Milli Konfederasiyası adından sərgilərin bütün iştirakçılarına və təşkilatçılarına müvəffəqiyyətlər arzulayıram! 

Hörmətlə,  

Məmməd Musayev  
Prezident  
Azərbaycan Respublikası Sahibkarlar (İşəgötürənlər) Təşkilatları Milli Konfederasiyası  

Azərbaycan Qida və İçki Sənayeçiləri Assosiasiyası” (AQİSA) adından 30-cu Azərbaycan Beynəlxalq Qida Sənayesi Sərgisi “InterFood Azerbaijan 2025” və 18-ci Azərbaycan Beynəlxalq Kənd Təsərrüfatı Sərgisi “Caspian Agro 2025”-in iştirakçılarını və qonaqlarını səmimi qəlbdən salamlayıram! 

AQİSA olaraq, qida və alkaqolsuz içki sənayesi sahəsində fəaliyyət göstərən yerli və beynəlxalq şirkətləri, eləcə də sektorda işgüzar fəaliyyətlə məşğul olan tərəfdaşları bir araya gətirir və ölkəmizin qida sənayesi ekosisteminin təkmilləşdirilməsinə dəstək verir. 

“InterFood Azerbaijan” və “Caspian Agro” sərgiləri illər ərzində regionda qida və aqrar sənayenin aparıcı platformasına çevrilmişdir. Bu iki sərgi qlobal qida sənayesi trendlərinə uyğun olaraq innovativ texnologiyaları, dayanıqlı istehsal metodlarını və yeni bazar imkanlarını iş adamları və sərmayədarlara təqdim edir. 

2024-cü ildə Bakıda keçirilən COP29 tədbiri çərçivəsində qida emalı və aqrar texnologiyalar da ön planda idi. Azərbaycanın iqlim və dayanıqlı inkişaf sahəsində icra etdiyi layihələr və maarifləndirmə, habelə mötəbər tədbirlərə ev sahibliyi etməklə iqlim dəyişiklikləri müzakirələrində aktiv rolunu bir daha təsdiqlədi. Məhz bu sərgilərdə dayanıqlı qida emalı və aqrar texnologiyalar və yaşıl iqtisadiyyata yönəlik innovativ həllər təqdim olunacaq ki, bu da Azərbaycanın regional və qlobal təşəbbüslərdəki roluna öz töhfəsini verəcək. 

Bu sərgilər işgüzar dairələrə qida və aqrar sənayenin ən yeni texnologiyaları və avadanlıqları ilə yaxından tanış olmaq, ən son innovasiyaları öz fəaliyyətlərində tətbiq etmək, yaşıl iqtisadiyyata uyğun həlləri mənimsəmək və yeni bazar imkanlarını araşdırmaq fürsəti yaradacaq. 

İnanırıq ki, “InterFood Azerbaijan 2025” və “Caspian Agro 2025” sərgiləri tədbir iştirakçıları üçün effektiv biznes platforması olmaqla yanaşı, yeni iş birliyi imkanları və dayanıqlı iqtisadi inkişaf istiqamətində də önəmli təkan verəcək. 

Bütün iştirakçılara uğurlu və məhsuldar iş arzulayır, sərgilərdə yaradılacaq yeni əməkdaşlıq imkanlarının sektorumuzun inkişafına böyük töhfə verəcəyinə inanırıq! 

Hörmətlə, 

Emin Dostiyari 
İdarə Heyətinin sədri 
Azərbaycan Qida və İçki Sənayeçiləri Assosiasiyası 

Sizi 18-ci Azərbaycan Beynəlxalq Kənd Təsərrüfatı Sərgisi və 30-cu Azərbaycan Beynəlxalq Qida Sənayesi Sərgisində salamlamaqdan böyük məmnunluq duyuram. FAO bu mühüm tədbirin bir hissəsi olmaqdan şərəf hissi keçirir. Bu sərgi hər gün qida təhlükəsizliyini təmin etmək, kənd təsərrüfatını gücləndirmək və daha dayanıqlı gələcək qurmaq üçün çalışan insanları bir araya gətirir. 

Bu ilki sərgi xüsusilə əlamətdardır. Cəmi bir neçə ay əvvəl Bakı COP29-a ev sahibliyi etdi və burada dünya liderləri dövrümüzün ən böyük çağırışlarından biri olan iqlim dəyişikliyi ilə mübarizə aparmaq üçün bir araya gəldilər. COP29-da apardığımız müzakirələr və verdiyimiz öhdəliklər təkcə Azərbaycanda deyil, bütün dünyada kənd təsərrüfatının gələcəyini müəyyən edəcək. Bu gün burada bir araya gələrək həmin impulsu davam etdiririk. Davamlı qida sistemləri, su ehtiyatlarının idarə olunması və iqlimə davamlı kənd təsərrüfatı artıq bir məqsəd deyil — zərurətdir. 

2025-ci il FAO üçün əlamətdar bir ildönümüdür — aclıqla mübarizə, qida təhlükəsizliyinin yaxşılaşdırılması və davamlı kənd təsərrüfatının təşviqi sahəsində 80 illik fəaliyyətimizin yubileyidir. Bu yubiley yalnız bir bayram deyil; bu, keçilən yolu qiymətləndirmək və hər kəsin təhlükəsiz və qidalı qidaya çıxışı olan gələcək üçün öhdəliyimizi yeniləmək imkanıdır. Bu isə kiçik fermerlərin dəstəklənməsi, resurslara ədalətli çıxışın təmin olunması, innovasiyaların təşviqi və heç kimin kənarda qalmaması deməkdir. 

Azərbaycanda FAO-nun hökumətlə tərəfdaşlığı güclü və əhəmiyyətli əməkdaşlığa çevrilmişdir. Birgə fəaliyyət çərçivəsində daha səmərəli suvarma sistemləri tətbiq edilmiş, kooperativlərin inkişafı dəstəklənmiş, fermerlərə bilik və bacarıqlar qazandıran təlim proqramları həyata keçirilmişdir. Bu layihələr yalnız məhsuldarlığın artırılmasına deyil, həyatların yaxşılaşdırılmasına, icmaların gücləndirilməsinə və gələcək nəsillər üçün daha sağlam bir planetin təmin edilməsinə xidmət edir. 

Kənd təsərrüfatı Azərbaycanın iqtisadiyyatının və kimliyinin mərkəzində dayanır. Sektor inkişaf etdikcə FAO innovasiyaların, rəqəmsal transformasiyanın və siyasətlərin formalaşdırılmasının dəstəklənməsinə sadiq qalır. Lakin bilirik ki, aqrar-qida sistemlərinin transformasiyası təkcə bir qurumun işi deyil. Bu proses hökumətlərin, beynəlxalq tərəfdaşların, özəl sektorun və ən əsası fermerlərin birgə səylərini tələb edir. 

Azərbaycanın kənd təsərrüfatı sahəsində qazandığı uğurları qeyd edərkən və COP29-un nəticələri üzərində inşa edərkən, hər birinizə gördüyünüz işlərə görə təşəkkür etmək istəyirəm. Bu sərgi yalnız tərəqqinin nümayişi deyil — bu, əməkdaşlıq, ilham və yeni imkanlar üçün bir məkandır. 

FAO adından hər birinizə bu ilki sərgidə məhsuldar, dəyərli və uğurlu təcrübə arzulayıram. Ümid edirəm ki, müzakirələriniz yeni ideyalar doğuracaq, tərəfdaşlıqlarınız real dəyişikliklərə səbəb olacaq və səyləriniz Azərbaycanın və dünyanın kənd təsərrüfatını daha da gücləndirəcəkdir. 

Nasar Hayat 
BMT-nin Ərzaq və Kənd Təsərrüfatı Təşkilatı (FAO) 

Azərbaycanda nümayəndəsi və FAO Tərəfdaşlıq və Əlaqələndirmə Ofisinin rəhbəri 

Hörmətlə, 

Edvard Straçan 
ICA Events 
Baş icraçı direktor