Məmməd Qəniyev, “Meysari” şirkətinin ixrac üzrə meneceri
2017-ci ildə təsis edilmiş şirkətimiz premium seqmentdə fəaliyyət göstərir və Cənubi Qafqazda orqanik şərab istehsal edən yeganə şirkətdir. Şirkət ekoloji sertifikata malikdir və yaxın zamanda “Kiwa” sertifikatının alınması planlaşdırılır ki, bu da məhsulların yalnız Avropaya deyil, həm də Amerika, Yaponiya və digər ölkələrə ixracına imkan verəcək.
Bu il “InterFood” sərgisində ziyarətçilərə təkcə tanınmış və özünü doğrultmuş məhsullarımız deyil, həm də yeni məhsul xətti təqdim olunur. Bu xəttə iki yeni şərab — “Esmer” və “Məhrur” daxildir. Bu şərabların istehsalında yerli monosepaj üzüm sortlarından istifadə olunur: “Esmer” üçün Bayatı Şiraz, “Məhrur” üçün isə Matrasa sortu tətbiq edilir. Hazırda şirkət üzüm bağlarını genişləndirir və əsas diqqət yerli monosepaj sortlara yönəldilir ki, gələcəkdə şərablar konkret mənşə bölgəsi ilə daha sıx bağlı olsun.
Bundan əlavə, sərgidə şirkətin yeni məhsulu — “Meysari” grappa içkisi təqdim olunur. İçki hazırda işlənmə mərhələsindədir və yaxın zamanda istehsalına başlanması planlaşdırılır. Grappa Muskat üzümü və onun çəyirdəklərindən hazırlanır, bu da ona özünəməxsus ətir və dad verir. Bizim üçün məhsulun həm daxili bazarda, həm də ixrac istiqamətində necə qarşılanacağını bilmək vacibdir, buna görə də sərgidə ziyarətçilər üçün içkinin ilkin versiyasının kiçik dequstasiyası təşkil olunub.
Yerli istehsalçı kimi biz sərgidə əsasən məhsulumuzu xarici iştirakçılara və ziyarətçilərə təqdim etmək məqsədilə iştirak edirik. Sərgi gözləntilərimizi tam doğruldur. “Meysari” şərablarını sərgi zallarında dequstasiya etmək imkanı potensial tərəfdaşlara məhsulumuzu ən yaxşı şəkildə təqdim edir. Düşünürəm ki, sərginin müsbət nəticələrini yaxın zamanda görəcəyik.
AZ
EN
RU
ZH
